ஷாப்பிங் மால்கள், மெட்ரோ ரயில் நிலையங்கள், விமான நிலையங்கள் மற்றும் பெரிய அலுவலகங்களில் எஸ்கலேட்டர்களை நாம் தினமும் பயன்படுத்துகிறோம். ஆனால், அதன் இருபுற ஓரங்களிலும் இருக்கும் கருப்பு நிற பிரஷ் எதற்காக பொருத்தப்பட்டுள்ளது என்பது பலருக்கும் தெரியாது. சிலர் அதை காலணியை சுத்தம் செய்வதற்கான வசதி என்று நினைக்கிறார்கள். ஆனால், உண்மையில் அது பயணிகளின் பாதுகாப்புக்காக வடிவமைக்கப்பட்ட முக்கிய பாதுகாப்பு அம்சம் ஆகும்.
எஸ்கலேட்டர் பிரஷ் என்றால் என்ன?
எஸ்கலேட்டரின் நகரும் படிக்கட்டுகளின் இருபுற ஓரங்களிலும் நீளமாக பொருத்தப்பட்டிருக்கும் பிரஷ் போன்ற அமைப்பே Escalator Safety Brush என்று அழைக்கப்படுகிறது. இது எஸ்கலேட்டரின் இயந்திரப் பகுதிக்குள் பொருட்கள் சிக்கிச் செல்லும் அபாயத்தை குறைக்க உதவும்.
ஏன் இந்த பிரஷ் பொருத்தப்பட்டுள்ளது?
எஸ்கலேட்டரின் நகரும் படிக்கட்டுக்கும் பக்கவாட்டுச் சுவருக்கும் இடையில் சிறிய இடைவெளி இருக்கும். இதில் பயணிகள் மிகவும் ஓரமாக நின்றால் ஷூ லேஸ், சேலை அல்லது துப்பட்டாவின் நுனி, வேட்டி, குழந்தைகளின் காலணிகள் போன்ற பொருட்கள் அந்த இடைவெளியில் சிக்கிக்கொள்ளும் அபாயம் ஏற்படலாம். இந்த அபாயத்தை குறைக்க இந்த பிரஷ் பொருத்தப்பட்டுள்ளது.
இது எப்படி பாதுகாப்பு அளிக்கிறது?
எஸ்கலேட்டரின் ஓரத்தில் உள்ள பிரஷ், கால்கள் அல்லது ஆடைகள் அதனைத் தொடும்போது லேசான உராய்வை ஏற்படுத்தும். இதனால் பயணிகள் இயல்பாகவே தங்களது காலை எஸ்கலேட்டரின் மையப்பகுதிக்கு நகர்த்துவார்கள். இது கால்களை ஓர இடைவெளிக்கு மிக அருகில் வைக்க வேண்டாம் என்பதை நினைவூட்டுகின்றன.
எஸ்கலேட்டரில் செல்லும்போது கவனிக்கவேண்டியவை
மஞ்சள் கோட்டிற்குள் கால்களை வைத்திருங்கள். பிரஷ் மீது கால்களை உரசவோ, அதில் விளையாடவோ வேண்டாம். குழந்தைகளை தனியாக எஸ்கலேட்டரில் விடாதீர்கள். சேலை, துப்பட்டா, வேட்டி போன்ற ஆடைகளின் நுனிகளை கவனமாக வைத்திருங்கள். ஷூ லேஸ்கள் நன்றாக கட்டப்பட்டுள்ளதா என்பதை உறுதி செய்யுங்கள். எஸ்கலேட்டரில் அமர்ந்து பயணம் செய்யவோ, ஓடவோ கூடாது.
