தெலங்கானாவில் ஆட்டோ கட்டணங்கள் கடந்த 2014 முதல் மாற்றப்படாத நிலையில், தற்போதைய பொருளாதார சூழல் மற்றும் உயர்ந்துவரும் செலவுகளை கருத்தில் கொண்டு புதிய கட்டண அமைப்பை அறிமுகப்படுத்த பரிந்துரை செய்யப்பட்டுள்ளது.
கட்டண மறுஆய்வு தொடர்பாக சமர்ப்பிக்கப்பட்ட அறிக்கையில், ஆட்டோவுக்கான குறைந்தபட்ச கட்டணத்தை ரூ.30 ஆக நிர்ணயிக்கவும், அதன்பின் ஒவ்வொரு கிலோமீட்டருக்கும் ரூ.14 வசூலிக்கவும் பரிந்துரைக்கப்பட்டுள்ளதாக தகவல்கள் தெரிவிக்கின்றன. தற்போது ஹைதராபாத்தில் நடைமுறையில் உள்ள கட்டண அமைப்பில் முதல் 1.6 கிலோமீட்டருக்கு ரூ.20 மற்றும் அதன்பிறகு கிலோமீட்டருக்கு ரூ.11 வசூலிக்கப்படுகிறது.
எரிபொருள் விலை உயர்வு, வாகன பராமரிப்பு செலவுகள், காப்பீட்டு கட்டணங்கள் மற்றும் செலவுகள் அதிகரித்துள்ளதால் தற்போதைய கட்டணத்தில் தொழிலை நடத்துவது சிரமமாக இருப்பதாக ஆட்டோ ஓட்டுநர் சங்கங்கள் தொடர்ந்து வலியுறுத்தி வருகின்றன. இதன் காரணமாக பல ஆண்டுகளாக கட்டண திருத்தம் கோரி அவர்கள் போராட்டங்களையும் நடத்தி வந்தனர்.
புதிய பரிந்துரைகள் அமல்படுத்தப்பட்டால், ஹைதராபாத்தில் தினசரி ஆட்டோ பயணம் மேற்கொள்ளும் பயணிகளுக்கு கூடுதல் செலவு ஏற்படலாம். அதே நேரத்தில், பல ஆண்டுகளாக கட்டண உயர்வு இல்லாததால் ஓட்டுநர்களின் வருமானம் பாதிக்கப்பட்டுள்ளதாக சங்கங்கள் கூறுகின்றன.
