டெல்லி ஆக்சிஜன் சிலிண்டர் வெடித்ததில் 35 வயது ஊழியர் ஒருவர் உயிரிழந்தார். மேலும் 4 பேர் காயமடைந்து மருத்துவமனையில் சிகிச்சை பெற்று வருகின்றனர்.
டெல்லியின் தென்கிழக்கு பகுதியில் உள்ள ஆக்லா பேஸ்-1, டி பிளாக் பகுதியில் ஆக்சிஜன் சிலிண்டர்களை சேமித்து வைக்கும் கிடங்கு செயல்பட்டு வந்தது. புதன்கிழமை காலை ஒரு ஆக்சிஜன் சிலிண்டர் வாகனத்தில் இருந்து கீழே விழுந்ததாக கூறப்படுகிறது. தரையில் விழுந்த அந்த சிலிண்டர் திடீரென வெடித்தது. இதில் மோகித் சிங் (35) என்ற ஊழியர் சம்பவ இடத்திலேயே உயிரிழந்தார்.
மேலும் இந்த விபத்தில், உமேஷ், அரவிந்த், மனோஜ் மற்றும் பங்கஜ் ஆகிய 4 பேர் காயமடைந்தனர். அவர்கள் சிகிச்சைக்காக டெல்லி எய்ம்ஸ் அதிர்ச்சி சிகிச்சை மையத்திற்கு அழைத்துச் செல்லப்பட்டனர்.
தற்போது சிலிண்டர் கீழே விழுந்ததைத் தொடர்ந்து வெடிப்பு ஏற்பட்டதாக முதற்கட்ட விசாரணையில் தெரியவந்துள்ளது. ஆனால் சிலிண்டர் எந்த காரணத்தால் வெடித்தது என்பது இன்னும் உறுதி செய்யப்படவில்லை.
இதற்காக தடயவியல் மற்றும் தொழில்நுட்பக் குழுவினர் சம்பவ இடத்தில் இருந்து ஆதாரங்களை சேகரித்துள்ளனர். வெடித்த சிலிண்டர், வாகனம் மற்றும் பிற பொருட்களை ஆய்வு செய்து வெடிப்புக்கான துல்லியமான காரணத்தை கண்டறியும் பணிகள் நடைபெற்று வருகின்றன.
