பஞ்சாப் மாநிலம் அமிர்தசரஸில் பணியில் இருந்த உதவி சப்-இன்ஸ்பெக்டர் ஹர்ஜித் சிங், அடையாளம் தெரியாத நபர்களால் துப்பாக்கியால் சுட்டுக்கொல்லப்பட்டார். இந்த சம்பவம் தொடர்பாக போலீசார் தீவிர விசாரணை மேற்கொண்டு வருகின்றனர்.
பணியில் இருந்தபோது துப்பாக்கிச்சூடு
அமிர்தசரஸ் நகரில் உள்ள பக்தன்வாலா தானா மண்டி பகுதியில், ஹர்ஜித் சிங் ரோந்து பணியில் இருந்துள்ளார். அப்போது, மோட்டார் சைக்கிளில் வந்த இருவர் அவரை நோக்கி துப்பாக்கியால் சுட்டுள்ளனர். துப்பாக்கிச்சூட்டில் படுகாயமடைந்த ஹர்ஜித் சிங் உடனடியாக மருத்துவமனைக்கு அழைத்துச் செல்லப்பட்டார். ஆனால், சிகிச்சை பலனின்றி அவர் உயிரிழந்தார்.
ஹர்ஜித் சிங் பஞ்சாபின் தர்ன் தரன் மாவட்டத்தைச் சேர்ந்தவர் என தெரிவிக்கப்பட்டுள்ளது. சம்பவ இடத்தில் இருந்து துப்பாக்கி குண்டின் காலி தோட்டா கைப்பற்றப்பட்டுள்ளதாகவும், அது தடயவியல் ஆய்வுக்கு அனுப்பப்பட்டுள்ளதாகவும் போலீஸ் தரப்பில் கூறப்பட்டுள்ளது.
சிசிடிவி காட்சிகள் ஆய்வு
சம்பவம் தொடர்பாக விசாரணையை தொடங்கியுள்ள போலீசார், தாக்குதல் நடத்தப்பட்ட பகுதியில் உள்ள சிசிடிவி கேமரா காட்சிகளை ஆய்வு செய்து வருகின்றனர். தாக்குதலுக்கான காரணம் இதுவரை அதிகாரப்பூர்வமாக உறுதி செய்யப்படவில்லை.
ரூ.1 கோடி நிவாரணம்
சப்-இன்ஸ்பெக்டர் ஹர்ஜித் சிங் உயிரிழந்ததற்கு பஞ்சாப் முதல்வர் பகவந்த் மான் இரங்கல் தெரிவித்துள்ளார். பணியில் உயிரிழந்த போலீஸ் அதிகாரியின் குடும்பத்துக்கு மாநில அரசு சார்பில் ரூ.1 கோடி நிவாரணம் வழங்கப்படும் என அவர் அறிவித்துள்ளார். மேலும், அதிகாரியின் குடும்பத்துக்கு கூடுதலாக ரூ.1 கோடி காப்பீட்டுத் தொகை வழங்கப்படும் என்றும் தெரிவிக்கப்பட்டுள்ளது.
