சென்னையில் புதிய தலைமைச் செயலகம் அமைக்கும் தமிழக அரசின் திட்டத்திற்கு எதிர்ப்புகள் எழுந்து வரும் நிலையில், மாற்று இடமாக பல்லவன் இல்லம் வளாகத்தை பரிசீலித்து வருவதாக தகவல் வெளியாகியுள்ளது.
சென்னை பட்டினப்பாக்கம் கடற்கரைப் பகுதியில் புதிய தலைமைச் செயலகம் அமைக்க தமிழக அரசு திட்டமிட்டுள்ளது. சுமார் ரூ.1,200 கோடி மதிப்பில் இந்த கட்டுமானத்தை மேற்கொள்ள அரசு நடவடிக்கை எடுத்துள்ளது. இதற்கான முதல் கட்ட அனுமதியை வழங்கி அரசாணையும் வெளியிடப்பட்டுள்ளது.
இந்த திட்டத்திற்கு பட்டினப்பாக்கம் பகுதியைச் சேர்ந்த மீனவர்கள் மற்றும் பல்வேறு தரப்பினரிடையே எதிர்ப்பு உருவானது. மேலும், போக்குவரத்து நெரிசல் அதிகமாக உள்ள பகுதியில் புதிய அரசு வளாகம் அமைந்தால், கூடுதல் போக்குவரத்து நெரிசல் ஏற்படும் என எதிர்ப்பு கிளம்பியது.
பட்டினப்பாக்கம் திட்டத்திற்கு எதிர்ப்பு அதிகரித்துள்ள நிலையில், அந்த திட்டத்தை ரத்து செய்ய உள்ளதாக தகவல்கள் வெளிவந்துள்ளன. இந்த சூழலில், புதிய தலைமைச் செயலகத்தை சென்னையின் பல்லவன் இல்லம் வளாகத்தில் அமைப்பது குறித்து அதிகாரிகள் ஆய்வு செய்து வருவதாக தகவல் வெளியாகியுள்ளது.
பல்லவன் இல்லம் வளாகத்தில் சுமார் 20 ஏக்கர் பரப்பளவில் புதிய அரசு நிர்வாகக் கட்டிடங்களை அமைப்பது குறித்து ஆலோசனை நடைபெறுவதாக தெரிவிக்கப்பட்டுள்ளது. பல்லவன் இல்லம் தற்போது மாநகர் போக்குவரத்துக் கழகம் மற்றும் விரைவு போக்குவரத்துக் கழகத்துடன் தொடர்புடைய பணிமனைகள் செயல்படும் பகுதியாக உள்ளது.
எனவே, அந்த இடத்தில் புதிய கட்டுமானம் மேற்கொள்ள வேண்டுமெனில், அங்குள்ள பணிமனைகளுக்கு மாற்று இடம் வழங்க வேண்டிய நிலை ஏற்படலாம் என்றும் தகவல் வெளியாகியுள்ளது. இருப்பினும், பல்லவன் இல்லத்தில் புதிய தலைமைச் செயலகம் அமைப்பது குறித்து அதிகாரப்பூர்வ அறிவிப்பு இன்னும் வெளியாகவில்லை.
