மகாத்மா காந்தியின் 157-வது பிறந்த நாள் இன்று நாடு முழுவதும் அனுசரிக்கப்படுகிறது. இதையொட்டி டெல்லியில் உள்ள காந்தியின் நினைவிடத்தில் பிரதமர் நரேந்திர மோடி உள்ளிட்ட தலைவர்கள் மலர் தூவி மரியாதை செலுத்தினர்.
மக்களவைத் தலைவர் ஓம் பிர்லா, டெல்லி துணைநிலை ஆளுநர் தரன்ஜித் சிங் சந்து, டெல்லி முதல்வர் ரேகா குப்தா, மத்திய அமைச்சர் மனோகர் லால் கட்டார் உள்ளிட்டோரும் ராஜ்காட்டில் காந்தியின் நினைவிடத்தில் மலர் தூவி அஞ்சலி செலுத்தினர்.
காந்தியின் கொள்கைகளை நினைவுகூர்ந்த பிரதமர் மோடி
மகாத்மா காந்தியின் வாழ்க்கை சத்தியம், அகிம்சை, கருணை மற்றும் சேவையின் அடையாளமாக இருப்பதாக பிரதமர் நரேந்திர மோடி தனது சமூக வலைதளப் பதிவில் தெரிவித்துள்ளார். காந்தியின் சிந்தனைகள் ஒவ்வொரு காலகட்டத்திலும் மனிதகுலத்திற்கு வழிகாட்டியாக இருக்கும் என்றும் அவர் குறிப்பிட்டுள்ளார்.
முதல்வர் விஜய் புகழாரம்
“அகிம்சை என்னும் பேராயுதத்தால் உலகையே வியக்க வைத்து, இந்தியத் திருநாட்டிற்கு விடுதலையைப் பெற்றுத்தந்த மாபெரும் தலைவர்” என காந்தியை அவர் குறிப்பிட்டுள்ளார். எளிமை, நேர்மை, மனிதநேயம், சமத்துவம் மற்றும் சமூக நல்லிணக்கம் ஆகியவற்றை தனது வாழ்வின் நெறிகளாகக் கொண்டு உலகம் முழுவதும் அன்பையும் சகோதரத்துவத்தையும் பரப்பியவர் காந்தி என்றும் அவர் குறிப்பிட்டுள்ளார்.
ஒரே நாளில் காந்தி மற்றும் சாஸ்திரி பிறந்த நாள்
அக்டோபர் 2-ம் தேதி மகாத்மா காந்தியின் பிறந்த நாள் மட்டுமல்ல. இந்தியாவின் முன்னாள் பிரதமர் லால் பகதூர் சாஸ்திரியின் பிறந்த நாளும் இதே நாளில் அனுசரிக்கப்படுகிறது.
சாஸ்திரியின் பிறந்த நாளையொட்டி பிரதமர் மோடி டெல்லியில் உள்ள விஜய் காட் நினைவிடத்திலும் மரியாதை செலுத்தினார். துணைக் குடியரசுத் தலைவர் சி.பி. ராதாகிருஷ்ணன் உள்ளிட்டோரும் சாஸ்திரியின் நினைவிடத்தில் அஞ்சலி செலுத்தினர்.
