தமிழ்நாட்டில் மகளிர், சிறுமியர் மற்றும் திருநர்கள் கட்டணமின்றி அரசுப் பேருந்துகளில் பயணம் செய்யும் வெற்றிப் பயணம் திட்டத்தைச் செயல்படுத்த 17 வழிகாட்டு நெறிமுறைகள் அறிவிக்கப்பட்டுள்ளன. கூடுதலாக 340 புறநகர் விரைவு மற்றும் சொகுசுப் பேருந்துகள் சாதாரணக் கட்டணப் பேருந்துகளாக மாற்றப்பட்டுள்ளதால், ஆண் பயணிகளுக்கும் ரூ.10 முதல் ரூ.16 வரை கட்டணம் குறைந்துள்ளது.
தமிழ்நாட்டில் மகளிர், கட்டணமின்றிப் பயணம் செய்யும் வகையில் வெற்றிப் பயணம் திட்டம் செயல்படுத்தப்பட்டு வருகிறது. இந்த வெற்றிப் பயணம் திட்டத்தின்கீழ் மாநகரப் பேருந்துகள், நகர்ப்புற சாதாரணக் கட்டணப் பேருந்துகள், விரைவுப் பேருந்துகள், எல்எஸ்எஸ் பேருந்துகள், டீலக்ஸ் பேருந்துகள், புறநகர் சாதாரணக் கட்டணப் பேருந்துகள் மற்றும் மலைப்பகுதி சாதாரணக் கட்டணப் பேருந்துகள் உள்ளிட்ட குறிப்பிட்ட சேவைகளில் தகுதியான பயணிகள் கட்டணமின்றிப் பயணம் செய்யலாம்.
வெற்றிப் பயணம் திட்டத்தின் விரிவாக்கத்தின் ஒரு பகுதியாக, மாவட்டங்களுக்கு இடையிலும் முக்கிய நகரங்களுக்கு இடையிலும் இயக்கப்படும் 340 விரைவு மற்றும் சொகுசுப் புறநகர் அரசுப் பேருந்துகள் சாதாரணக் கட்டணப் பேருந்துகளாக மாற்றப்பட்டுள்ளன.
அரசுப் போக்குவரத்துக் கழக அதிகாரிகள் தெரிவித்த தகவலின்படி, இந்த மாற்றத்தால் சம்பந்தப்பட்ட பேருந்துகளில் பயணம் செய்யும் ஆண் பயணிகளுக்குத் தூரத்தைப் பொறுத்து ரூ.10 முதல் ரூ.16 வரை கட்டணம் குறைந்துள்ளது.
திட்டம் விரிவாக்கப்படுவதற்கு முன்பு 2,050 புறநகர் சாதாரணக் கட்டணப் பேருந்துகள் இயக்கப்பட்டு வந்த நிலையில், தற்போது அந்த எண்ணிக்கை 2,390 ஆக உயர்ந்துள்ளது. மொத்தமாக 12,695 பேருந்துகளில் மகளிர் கட்டணமின்றிப் பயணம் செய்யும் வசதி வழங்கப்படுவதாக அதிகாரிகள் தெரிவித்துள்ளனர்.
