உலகப் புகழ்பெற்ற மதுரை மீனாட்சி அம்மன் கோவிலில் மகா கும்பாபிஷேகம் செப்டம்பர் 17-ம் தேதி நடைபெறுகிறது. இதற்காக அங்கு ஏற்பாடுகள் தீவிரமாக நடைபெற்று வருகிறது. கோவில் அலங்காரம், பக்தர்களுக்கான போக்குவரத்து வசதிகள் என பல்வேறு பணிகள் தீவிரமாக நடைபெற்று வருகின்றன.
கும்பாபிஷேகத்தை முன்னிட்டு செப்டம்பர் 11-ம் தேதி முதல் பூர்வாங்க பூஜைகள் தொடங்கின. கோவிலின் வடக்காடி வீதியில் பிரமாண்டமான யாகசாலை அமைக்கப்பட்டு, அங்கு ஹோமங்கள் நடைபெற்று வருகின்றன. சுமார் 400 சிவாச்சாரியார்கள் பங்கேற்று வேத மந்திரங்கள் முழங்க சிறப்பு பூஜைகளை நடத்தி வருகின்றனர்.
5 டன் மலர்களால் கோவில் அலங்காரம்
கும்பாபிஷேக விழாவுக்காக மீனாட்சி அம்மன் கோவிலின் ராஜகோபுரங்கள், பிரகாரங்கள், மூலவர் சன்னதிகள் மற்றும் கொடிமரம் உள்ளிட்ட முக்கிய பகுதிகள் மலர்களால் அலங்கரிக்கப்பட உள்ளன. இதற்காக மொத்தம் சுமார் 5 டன் மலர்கள் கோவிலுக்கு வந்துள்ளன.
மலர் மாலைகள் தயாரிக்கும் பணிகள் புதுமண்டபத்தில் நடைபெற்று வருகிறது. இதில் சுமார் 50 பேர் பணியில் ஈடுபட்டுள்ளனர். முதற்கட்டமாக உயரமான ராஜகோபுரங்களுக்கு மலர் மாலைகள் தயாரிக்கும் பணிகள் தொடங்கியுள்ளன. பின்னர் மூலவர் சன்னதி மற்றும் கொடிமரம் உள்ளிட்ட பகுதிகளிலும் மலர் அலங்காரம் செய்யப்பட உள்ளது.
பக்தர்களுக்காக சிறப்பு பேருந்துகள்
கும்பாபிஷேகத்தையொட்டி மதுரைக்கு வரும் பக்தர்களின் எண்ணிக்கை அதிகரிக்கும் என்பதால் போக்குவரத்து வசதிகளும் ஏற்பாடு செய்யப்பட்டுள்ளன.
சென்னை கிளாம்பாக்கம் பேருந்து நிலையத்தில் இருந்து செப்டம்பர் 16-ம் தேதி மதுரைக்கு 50 சிறப்பு பேருந்துகள் இயக்கப்பட உள்ளன. இதேபோல் கோவை, திருப்பூர், ராமநாதபுரம், சிவகாசி, ராஜபாளையம், தேனி, திண்டுக்கல் உள்ளிட்ட பல்வேறு நகரங்களில் இருந்தும் கூடுதல் பேருந்துகள் இயக்கப்பட உள்ளன.
மதுரை மாநகரைச் சுற்றியுள்ள திருமங்கலம், மேலூர், திருப்புவனம், வாடிப்பட்டி, நத்தம், பூவந்தி, உசிலம்பட்டி உள்ளிட்ட பகுதிகளில் இருந்தும் தலா 20 சிறப்பு பேருந்துகள் இயக்கப்பட உள்ளன. இதனால் தொலைதூரங்களில் இருந்து வரும் பக்தர்கள் கோவிலை எளிதாக சென்றடைய முடியும் என எதிர்பார்க்கப்படுகிறது.
புதிய வரவாக 5 வயது யானை
கும்பாபிஷேக ஏற்பாடுகளுக்கு இடையே மதுரை மீனாட்சி அம்மன் கோவிலுக்கு புதிய வரவாக 5 வயது பெண் யானை துர்கா வந்துள்ளது. அசாமில் உள்ள மானஸ் தேசிய பூங்கா பகுதியில் இருந்து சுமார் 3,000 கிலோமீட்டர் தொலைவை கடந்து மூன்று நாட்கள் பயணத்துக்குப் பிறகு மதுரையை வந்தடைந்தது.
விநாயகர் சதுர்த்தி தினத்தன்று அதிகாலை கோவிலுக்கு வந்த துர்காவுக்கு கோவில் பட்டர்கள் சிறப்பு பூஜை நடத்தினர். பின்னர் கோவில் பணியாளர்கள் மலர்கள் தூவி வரவேற்பு அளித்தனர்.
மீனாட்சி கோவிலில் முன்பு பல யானைகள் இருந்த நிலையில், தற்போது பார்வதி என்ற யானை மட்டுமே இருந்து வந்தது. கூடுதல் யானை வேண்டும் என்ற பக்தர்களின் கோரிக்கைக்கு பின்னர் அரசு அனுமதியுடன் அசாமில் இருந்து தமிழகத்தின் பல்வேறு கோவில்களுக்கு யானைகள் கொண்டு வரப்பட்டுள்ளன.
கும்பாபிஷேகத்துக்கு தயாராகும் மதுரை
மலர் அலங்காரம், யாகசாலை பூஜைகள், சிறப்பு போக்குவரத்து ஏற்பாடுகள் மற்றும் புதிய யானையின் வருகை என மதுரை மீனாட்சி அம்மன் கோவில் கும்பாபிஷேகத்துக்கான பணிகள் வேகமாக நடைபெற்று வருகின்றன. செப்டம்பர் 17-ம் தேதி நடைபெற உள்ள மகா கும்பாபிஷேகத்தை முன்னிட்டு மதுரை நகரமே விழாக்கோலம் பூண்டுள்ளது.
