தெலங்கானா மாநிலத்தில் மது போதையில் தடுமாறி, சுமார் 50 அடி ஆழமுள்ள விவசாயக் கிணற்றில் விழுந்த நபரைத் தீயணைப்பு வீரர்கள் பத்திரமாக மீட்டனர்.
தெலங்கானா மாநிலம், கரீம்நகர் மாவட்டத்தில் வசிக்கும் பிரதீப் என்பவர், நேற்று இரவு மது போதையில் சுமார் 50 அடி ஆழமுள்ள விவசாயக் கிணற்றில் தவறி விழுந்தார். கிணற்றில் விழுந்து வெளியேற முடியாமல் அவர் தவித்த நிலையில், இதுகுறித்து தீயணைப்புத் துறையினருக்குத் தகவல் தெரிவிக்கப்பட்டது.
தகவலறிந்து சம்பவ இடத்திற்கு வந்த தீயணைப்பு துறையினர் கயிறுகளின் உதவியுடன் பிரதீப்பைப் பாதுகாப்பாக மேலே கொண்டு வந்தனர். இந்தச் சம்பவம் சாலையோரத்தில் அமைந்திருந்த விவசாயக் கிணற்றில் நடந்துள்ளது.
பாதுகாப்பு வேலி இல்லாத திறந்தவெளிக் கிணறுகள், இரவு நேரங்களில், பொதுமக்களுக்கு ஆபத்தை ஏற்படுத்தக்கூடும். எனவே, இதுபோன்ற விபத்துகளைத் தடுக்க, பயன்பாட்டில் இல்லாத பழைய கிணறுகளைச் சுற்றி வலுவான பாதுகாப்பு வேலி அமைக்க வேண்டும் என்று தீயணைப்புத் துறையினர் அறிவுறுத்தியுள்ளனர்.
