ஒடிசாவில் அரசு பதிவுகளில் இறந்தவர்களாக குறிப்பிடப்பட்ட 2,487 தொழிலாளர்களின் ஆதார் அங்கீகாரத்தை பயன்படுத்தி ரேஷன் பொருட்களை பெற்றதாக அதிர்ச்சி தகவல் வெளியாகியுள்ளது. இந்த விவகாரம் ஒடிசா அரசின் உணவு வழங்கல் மற்றும் நுகர்வோர் நலத்துறையிடமிருந்து பெறப்பட்ட தரவுகளை ஆய்வு செய்தபோது தெரிய வந்துள்ளது.
ஒடிசா அரசின் ‘நிர்மான் ஷ்ராமிக்’ திட்டத்தின் கீழ் பதிவு செய்யப்பட்ட கட்டுமானத் தொழிலாளர்களின் தரவுகள் ஆய்வு செய்யப்பட்டன. அதில் 2,487 பேர் இறந்ததாக பதிவு செய்யப்பட்ட பயனாளிகளுக்கு ரேஷன் பொருட்கள் வழங்கப்பட்டது தெரிய வந்தது.
இறந்ததாக பதிவு செய்யப்பட்ட தொழிலாளர்களின் குடும்பத்தினருக்கு ரூ.15.10 கோடி இறப்பு நிவாரணமாக வழங்கப்பட்டதாக தெரிவிக்கப்பட்டுள்ளது. ஆனால், அதே பயனாளிகளின் பெயரில் தொடர்ந்து உணவு பொருட்களை வாங்கியது தெரிய வந்துள்ளது.
இந்த விவகாரத்தில் பதிவுகள், பயனாளிகளின் விவரங்கள் மற்றும் வங்கிக் கணக்கு தகவல்கள் முறையாக சரிபார்க்கப்பட்டதா என கேள்வி எழுந்துள்ளது.
