தமிழகத்தில் அதிகரித்து வரும் மின்தேவையையும், மின்வெட்டுப் பிரச்னையையும் சமாளிக்க, தனியார் நிறுவனங்களிடம் இருந்து ஒரு யூனிட் மின்சாரத்தை ரூ. 35-க்கு கொள்முதல் செய்ய தமிழக அரசு திட்டமிட்டுள்ளதாகத் தகவல்கள் வெளியாகியுள்ளன. இந்த தகவல் அரசியல் வட்டாரத்தில் பெரும் விவாதத்தை ஏற்படுத்தியுள்ளது.
தமிழகத்தில் மின்பற்றாக்குறை
தமிழகத்தில் பல்வேறு இடங்களில் அறிவிக்கப்படாத மின்வெட்டு ஏற்பட்டு வருகிறது. குறிப்பாக இரவு நேரங்களில் மின்வெட்டு ஏற்படுவதால் மக்கள் அவதியடைந்து வருகின்றனர். இதனை கண்டித்து பல இடங்களில் அடிக்கடி போராட்டமும் நடைபெற்று வருகிறது. மின்சார வாகனங்களின் பயன்பாடு அதிகரித்துள்ளதால் மின்தேவையும் அதிகரித்துள்ளது.
இந்தச் சூழலில், மின்தேவையைச் சமாளிக்க வெளிச்சந்தையில் இருந்து மின்சாரம் வாங்கத் தமிழ்நாடு மின்சார வாரியம் நடவடிக்கை எடுத்துள்ளது. தனியார் நிறுவனங்களிடம் இருந்து ஒரு யூனிட் மின்சாரத்தை ரூ.35 வரை கொடுத்து வாங்கத் திட்டமிட்டுள்ளதாக தகவல் வெளியாகி உள்ளது.
ஒரு யூனிட்டுக்கு ரூ.24.68 இழப்பு ஏற்படும் – அன்புமணி ராமதாஸ் எச்சரிக்கை
பாமக தலைவர் அன்புமணி ராமதாஸ் கூறியதாவது, ஒரு மெகாவாட் மின்சாரத்தை ஒரு மணி நேரம் பயன்படுத்தினால் 1,000 யூனிட் மின்சாரம் கிடைக்கும். அந்த அடிப்படையில், 4,500 மெகாவாட் மின்சாரத்தை முழுமையாக ஒரு மணி நேரம் பயன்படுத்தினால் 45 லட்சம் யூனிட் மின்சாரம் கிடைக்கும்.
இதே அளவு மின்சாரத்தை 24 மணி நேரமும் பயன்படுத்தினால், ஒரு நாளைக்கு 10.8 கோடி யூனிட் மின்சாரம் கிடைக்கும். ஒரு யூனிட் மின்சாரத்தை ரூ.35-க்கு வாங்கி, அதற்கு சராசரியாக ரூ.10.32 மட்டுமே வருவாய் கிடைப்பதாகக் கணக்கிட்டால், ஒரு யூனிட்டுக்கு ரூ.24.68 இழப்பு ஏற்படும் என்று அன்புமணி தெரிவித்துள்ளார்.
தமிழகத்தின் சராசரி மின்தேவை சுமார் 22,000 மெகாவாட் என்ற நிலையில், மின்சார வாரியத்தின் சொந்த அனல் மின் நிலையங்களில் உற்பத்தியை அதிகரிக்க வேண்டும் என்றும் அவர் குறிப்பிட்டுள்ளார்.
ரூ.35-க்கு மின்சாரம் வாங்குவது ஏன்? டி.ஆர்.பி. ராஜா கேள்வி
திமுக முன்னாள் அமைச்சர் டி.ஆர்.பி. ராஜா கூறியதாவது, முந்தைய திமுக ஆட்சிக் காலத்தில் ஒரு யூனிட் மின்சாரத்துக்கு ரூ.5.40 முதல் ரூ.9.50 வரை வாங்கப்பட்டது. தற்போது ரூ.35 முதல் ரூ.37 வரை விலை கொடுத்து மின்சாரம் வாங்க வேண்டிய நிலை ஏன் ஏற்பட்டது என்று கேள்வி எழுப்பியுள்ளார். 20 நாட்களுக்கு முழுமையாக இந்த மின்சாரத்தைக் கொள்முதல் செய்தால் ரூ.3,100 கோடிக்கும் அதிகமாகச் செலவாகலாம் என அவர் கூறியுள்ளார்.
மின்கட்டணம் உயருமா?
மின்சார வாரியம் அதிக விலையில் மின்சாரம் வாங்க வேண்டிய நிலை தொடர்ந்து நீடித்தால், அதன் நிதிச்சுமை அதிகரிக்கலாம். ஏற்கனவே மின்கட்டணம் அதிகரித்துள்ள நிலையில் மேலும் அதிகரிக்க வாய்ப்பு உள்ளது. சொந்த மின் உற்பத்தியை அதிகரித்தல், நிலக்கரி இருப்பை முறையாகத் திட்டமிடுதல் போன்ற நடவடிக்கைகள் எடுத்தால் மட்டுமே இந்த பிரச்சனைக்கு நிரந்தர தீர்வு கிடைக்கும்.
