1949ஆம் ஆண்டு தொடங்கிய திமுக, திராவிட இயக்கத்தின் சமூக மற்றும் அரசியல் கருத்துகளை தேர்தல் அரசியலுக்குள் கொண்டு வந்த முக்கிய கட்சிகளில் ஒன்றாக இருந்துள்ளது. அண்ணா, கருணாநிதி மற்றும் தற்போது மு.க.ஸ்டாலின் தலைமையிலான காலகட்டங்களில் கட்சியின் கொள்கைகள் வெவ்வேறு வடிவங்களில் தொடர்ந்து நடைபெற்று வருகிறது. திராவிட முன்னேற்றக் கழகத்தின் பயணம் 78-ஆம் ஆண்டில் அடியெடுத்து வைத்துள்ளதை முன்னிட்டு திமுக கடந்து வந்த வரலாறு குறித்து இந்த பதிவில் பார்ப்போம்.
திமுக உருவான வரலாறு
திராவிட முன்னேற்றக் கழகம் (திமுக) 1949ஆம் ஆண்டு செப்டம்பர் 17ஆம் தேதி சி.என் அண்ணாதுரை அவர்களால் உருவாக்கப்பட்டது. இதன் அரசியல் பின்னணி நீதிக்கட்சி, சுயமரியாதை இயக்கம், பின்னர் பெரியார் ஈ.வெ.ரா. தலைமையிலான திராவிடர் கழகம் ஆகியவற்றுடன் தொடர்புடையது.
1944ஆம் ஆண்டு பெரியார் தலைமையில் திராவிடர் கழகம் உருவாக்கப்பட்டது. சமூக நீதி, சாதி அடிப்படையிலான ஏற்றத்தாழ்வுக்கு எதிர்ப்பு, பகுத்தறிவு, சுயமரியாதை, பெண்கள் உரிமை உள்ளிட்ட கருத்துக்கள் முன்வைக்கப்பட்டது.
1949ஆம் ஆண்டு பெரியாருக்கும் அண்ணாதுரைக்கும் இடையே ஏற்பட்ட கருத்து வேறுபாடு காரணமாக அண்ணாதுரை தலைமையில் புதிய கட்சி தொடங்கப்பட்டது. அந்த கட்சிதான் திராவிட முன்னேற்றக் கழகம். இதில் மு.கருணாநிதி, இரா.நெடுஞ்செழியன் உள்ளிட்டோர் அண்ணாவுடன் இணைந்து செயல்பட்டனர்.
ஆட்சிக்கு வந்த திமுக
1967ஆம் ஆண்டு சட்டப்பேரவைத் தேர்தலில் 138 தொகுதிகளில் வெற்றி பெற்று தமிழகத்தில் முதன்முறையாக திமுக ஆட்சி அமைத்தது. அண்ணாதுரை முதலமைச்சரானார். 1969ஆம் ஆண்டு அவர் மறைந்த பிறகு மு.கருணாநிதி முதலமைச்சராகப் பொறுப்பேற்றார். அதன் பின்னர் திமுகவின் அரசியல் பயணத்தில் மு.கருணாநிதி முக்கியமான தலைவராக இருந்து வந்தார்.
திமுக செய்த முக்கிய சாதனைகள்
திமுக ஆட்சிகளில் பிற்படுத்தப்பட்டோர் மற்றும் மிகவும் பிற்படுத்தப்பட்டோர் நலத்துக்கான தனித்துறை அமைப்புகள், கல்வி மற்றும் சமூக நலத்திட்டங்கள் விரிவுபடுத்தப்பட்டன. தமிழக அரசின் பிற்படுத்தப்பட்டோர் நலத்துறை வரலாற்றுத் தகவலின்படி, பிற்படுத்தப்பட்டோர் நல இயக்குநரகம் 1969ஆம் ஆண்டு தனியாக உருவாக்கப்பட்டது. பின்னர் மிகவும் பிற்படுத்தப்பட்டோர் மற்றும் சீர்மரபினர் சமூகங்களுக்காக தனி இயக்குநரகமும் அமைக்கப்பட்டது.
அண்ணா ஆட்சியில் சுயமரியாதைத் திருமணங்களுக்கு சட்ட அங்கீகாரம், சென்னை மாகாணத்துக்கு “தமிழ்நாடு” எனப் பெயர் மாற்றம், தமிழ்-ஆங்கிலம் என்ற இருமொழிக் கொள்கை, சமூக நீதி, இடஒதுக்கீடு, தமிழ் மொழி மற்றும் மாநில உரிமைகள், கல்வி, பெண்கள் நலன் மற்றும் சமூக நலத்திட்டங்கள் ஆகியவை கொண்டு வரப்பட்டது.
திமுக சந்தித்த நெருக்கடிகள்
திமுக தனது அரசியல் பயணத்தில் பல்வேறு நெருக்கடிகளை சந்தித்துள்ளது. 1960 களில் நடைபெற்ற இந்தி எதிர்ப்பு போராட்டம் திமுகவின் முக்கியத்துவம் வாய்ந்ததாக பார்க்கப்படுகிறது.
1972ஆம் ஆண்டு எம்.ஜி.ராமச்சந்திரன் திமுகவிலிருந்து பிரிந்து அதிமுகவை உருவாக்கினார். இந்த நிகழ்வு அரசியல் வரலாற்றில் மற்றொரு முக்கிய திருப்பமாக அமைந்தது.
1976ஆம் ஆண்டு திமுக அரசு கலைக்கப்பட்டது. அதன்பின்னர் பல தேர்தல்களில் திமுக வெற்றி மற்றும் தோல்விகளை சந்தித்துள்ளது. தமிழகத்தில் திமுகவுக்கு இணையாக அதிமுக செயல்பட்டு வருகிறது.
திமுக மீதான விமர்சனங்கள்
குடும்ப அரசியல் மற்றும் கட்சியில் வாரிசு அரசியல் இருப்பதாக அரசியல் கட்சிகள் விமர்சித்து வருகின்றன.
ஊழல் மற்றும் நிர்வாக முறைகேடுகள் தொடர்பான குற்றச்சாட்டுகள் பல்வேறு காலகட்டங்களில் அரசியல் விவாதமாகியுள்ளன.
இலவச மற்றும் மானியத் திட்டங்கள் அரசின் நிதிச்சுமையை அதிகரிக்கக்கூடும் என்று விமர்சகர்கள் கூறுகின்றனர்.
மாநில உரிமைகள் மற்றும் மத்திய அரசுடனான அதிகாரப் பகிர்வு தொடர்பான திமுகவின் நிலைப்பாடுகள் குறித்து அரசியல் எதிர்ப்புகள் உள்ளன.
மதம், மொழி, சாதி மற்றும் சமூக நீதி தொடர்பான திமுகவின் அரசியல் அணுகுமுறைகளும் ஆதரவு மற்றும் எதிர்ப்பு ஆகிய இரு விதமான அரசியல் கருத்துகளை உருவாக்கியுள்ளன.
