அமெரிக்க அதிபர் டொனால்ட் டிரம்ப், CNN, MS NOW மற்றும் Politico ஆகிய செய்தி நிறுவனங்களின் செய்தியாளர்களை வெள்ளை மாளிகைக்குள் அனுமதிக்கத் தடை விதித்ததைத் தொடர்ந்து, அமெரிக்காவின் முக்கிய தொலைக்காட்சி நெட்வொர்க்குகள் டிரம்பின் நிகழ்ச்சிகளுக்கான நேரடி கவரேஜை நிறுத்தியுள்ளன. ABC, CBS, Fox மற்றும் NBC ஆகிய செய்தி நிறுவனமும் இந்த நடவடிக்கையில் இணைந்தன.
டிரம்ப் நிர்வாகம் கடந்த வெள்ளிக்கிழமை CNN, MS NOW மற்றும் Politico ஆகிய செய்தி நிறுவனங்களின் செய்தியாளர்களை வெள்ளை மாளிகைக்குள் அனுமதிக்கத் தடை விதித்தது. தங்களது செய்திகளை வெள்ளை மாளிகை எதிர்த்ததால் இந்த நடவடிக்கை எடுக்கப்பட்டதாக அந்த நிறுவனங்கள் கூறியுள்ளன.
அமெரிக்காவில் வெள்ளை மாளிகை நிகழ்ச்சிகளுக்கான தொலைக்காட்சி செய்தி சேவை பொதுவாக ஒரு ‘TV pool’ முறையில் நடைபெறும். செப்டம்பர் 21 அன்று CNN இந்தப் பணியை மேற்கொள்ள வேண்டியிருந்தது. ஆனால் CNN-க்கு வெள்ளை மாளிகை அனுமதி மறுக்கப்பட்டதால், ABC, CBS, Fox மற்றும் NBC ஆகியவை அந்த நாளுக்கான அதிபர் நிகழ்ச்சிகளின் ‘pool’ கவரேஜை நிறுத்த முடிவு செய்தன.
இந்த முடிவின் காரணமாக, டிரம்பின் நியூயார்க் பயணம் மற்றும் ஐ.நா. பொதுச்சபை தொடர்பான நிகழ்ச்சிகளுக்கும் வழக்கமான தொலைக்காட்சி ‘pool’ கவரேஜ் வழங்கப்படவில்லை. தடைக்குப் பிறகு, வெள்ளை மாளிகையின் தெற்கு புல்வெளியில் புதிய ஹெலிபேட் தொடர்பான நிகழ்ச்சி நடைபெற்றது. இதில் டிரம்ப் பேசினார். அப்போது வழக்கமான கவரேஜ் இல்லாததால், டிரம்பின் பேச்சு தெளிவாகப் பதிவாகவில்லை. அருகில் இருந்த ஹெலிகாப்டரின் சத்தமே ஒலிபரப்பில் அதிகமாகக் கேட்டதாக செய்தி நிறுவனங்கள் தெரிவித்தன.
வெள்ளை மாளிகை தடைக்கு எதிராக CNN, MS NOW மற்றும் Politico ஆகியவை டிரம்ப் நிர்வாகத்திற்கு எதிராக நீதிமன்றத்தில் வழக்குத் தொடர்ந்துள்ளன. வெள்ளை மாளிகையின் நடவடிக்கையை உடனடியாக ரத்து செய்ய வேண்டும் என்றும் அவர்கள் கோரியுள்ளனர்.
வெள்ளை மாளிகை நிர்வாகம் சமீபத்தில் ‘TRUMP TV: The Essentials Station’ என்ற பெயரில் 24 மணி நேர டிஜிட்டல் வீடியோ சேவையைத் தொடங்கியுள்ளது. அதிபர் டிரம்பின் உரைகள், நிர்வாக அறிவிப்புகள் மற்றும் அரசு தொடர்பான நிகழ்வுகளை நேரடியாக மக்களிடம் கொண்டு செல்வதே இதன் நோக்கமாக தெரிவிக்கப்பட்டுள்ளது.
