தமிழ் மாதங்களில் புரட்டாசி மாதத்திற்கு தனிச்சிறப்பு உண்டு. குறிப்பாக பெருமாளை வழிபடும் பக்தர்கள் இந்த மாதத்தில் விரதம் இருப்பார்கள். புரட்டாசி சனிக்கிழமைகளில் பெருமாள் கோயில்களுக்குச் சென்று வழிபடுவார்கள். வீடுகளில் சிறப்பு பூஜைகள் செய்வார்கள்.
புரட்டாசி மாதத்தில் மட்டும் ஏன் அசைவ உணவுகளைத் தவிர்க்க வேண்டும் என்ற கேள்வி பலருக்கும் இருக்கும். இதற்கு பின்னால் இருக்கும் காரணங்களை குறித்து பார்ப்போம்.
புரட்டாசி மாதம் மகாவிஷ்ணுவை வழிபடுவதற்கு உகந்த காலமாக பார்க்கப்படுகிறது. இந்த மாதத்தில் பெருமாள் கோயில்களில் சிறப்பு வழிபாடுகள், பிரம்மோற்சவம் உள்ளிட்ட நிகழ்ச்சிகள் நடைபெறும்.
அந்த மாதத்தில் பெருமாளை நினைத்து விரதம் இருப்பதால் அசைவ உணவுகளைத் தவிர்த்து சைவ உணவுகளை மட்டும் சாப்பிடுவார்கள். புரட்டாசி மாதத்தில் மகாளயபட்சம் வருவது மற்றொரு முக்கிய காரணமாகக் கூறப்படுகிறது. இந்த காலகட்டத்தில் முன்னோர்களை நினைத்து வழிபாடு செய்வது கடைபிடிக்கப்பட்டு வருகிறது.
இது தவிர, புரட்டாசி காலகட்டத்திலேயே நவராத்திரி உள்ளிட்ட பல்வேறு ஆன்மிக நிகழ்ச்சிகளும் நடைபெறும். மாதம் முழுவதும் வழிபாடு மற்றும் விரதத்திற்கு முக்கியத்துவம் கொடுக்கப்பட்டு வருவதால் உணவு விஷயத்தில் கவனத்துடன் இருக்கிறார்கள்.
புரட்டாசி மாதத்தில் பருவநிலையில் மாற்றங்கள் ஏற்படும். வெயில் குறைந்து மழைக்காலம் தொடங்கும் இந்த காலத்தில் உணவில் கட்டுப்பாட்டை கடைப்பிடிப்பது அவசியம். குறிப்பாக அசைவ உணவுகளைத் தவிர்த்து, எளிதில் செரிமானமாகும் சைவ உணவுகளை எடுத்துக்கொள்ள வேண்டும் என சிலர் இதனை பின்பற்றுகின்றனர்.
புரட்டாசி சனிக்கிழமைகளில் விரதம் இருந்து, பெருமாளை வழிபட்டு, வீட்டில் சிறப்பு உணவு படைத்து வழிபாடு செய்வது பல குடும்பங்களில் தொடர்ந்து வருகிறது. எனவே, பக்தி மற்றும் குடும்ப வழக்கத்தின் அடிப்படையில் பலர் இந்த மாதத்தில் அசைவ உணவுகளை தவிர்க்கின்றனர்.
இதையும் படிங்க : வீட்டில் ஒன்றுக்கு மேற்பட்ட துளசி செடிகளை வளர்க்கலாமா? வாஸ்து நம்பிக்கைகள் கூறுவது என்ன?
