உலகம் முழுவதும் இன்று அக்டோபர் 5-ம் தேதி உலக ஆசிரியர் தினம் கடைப்பிடிக்கப்படுகிறது. மாணவர்களுக்கு பாடப்புத்தக அறிவை மட்டும் வழங்காமல், அவர்களின் சிந்தனை, ஒழுக்கம், திறமை மற்றும் எதிர்காலத்தை வடிவமைக்கும் ஆசிரியர்களின் பங்களிப்பை போற்றும் நாளாக இந்த நாள் உள்ளது.
உலக ஆசிரியர் தினம் எப்படி உருவானது?
சர்வதேச அளவில் ஐக்கிய நாடுகள் சபையின் யுனெஸ்கோ மற்றும் பன்னாட்டு தொழிலாளர் அமைப்பு ஆகியவை இணைந்து அக்டோபர் 5-ஐ உலக ஆசிரியர் தினமாக அறிவித்துக் கொண்டாடி வருகின்றன. இந்த பெருமைமிக்க வரலாற்று நிகழ்வு ஏற்படுத்தப்பட்டு 60 ஆண்டுகள் நிறைவடைந்துள்ளது.
இந்தியாவில் ஆசிரியர் தினம் எப்போது கொண்டாடப்படுகிறது?
இந்தியாவில் 1962-ம் ஆண்டு முதல் ஆசிரியர் தினம் கடைப்பிடிக்கப்பட்டு வருகிறது. இந்தியாவின் முன்னாள் குடியரசுத் தலைவர் டாக்டர் ராதாகிருஷ்ணனின் பிறந்த நாளான செப்டம்பர் 5 ஆசிரியர் தினமாகக் கொண்டாடப்படுகிறது.
யார் இந்த ராதாகிருஷ்ணன்?
1888 செப்டம்பர் 5 அன்று ஆந்திரப் பிரதேசத்தில் உள்ள ஒரு சிறிய நகரத்தில் பிறந்தார். எளிய குடும்பப் பின்னணியில் பிறந்த அவர், கல்வியில் சிறந்து விளங்கினார்.
சென்னை கிறிஸ்தவக் கல்லூரியில் தத்துவத்தைப் பயின்ற அவர், பின்னர் ஆசிரியர் பணியில் சேர்ந்தார். சென்னை மாநிலக் கல்லூரி, மைசூர் பல்கலைக்கழகம், கல்கத்தா பல்கலைக்கழகம் உள்ளிட்ட கல்வி நிறுவனங்களில் பேராசிரியராகப் பணியாற்றினார்.
1952-ம் ஆண்டு இந்தியாவின் துணைக் குடியரசுத் தலைவராகத் தேர்ந்தெடுக்கப்பட்டார். 1954-ம் ஆண்டு நாட்டின் உயரிய குடிமகன் விருதான பாரத ரத்னா வழங்கி அவர் கௌரவிக்கப்பட்டார். பின்னர் 1962 முதல் 1967 வரை இந்தியாவின் இரண்டாவது குடியரசுத் தலைவராக பதவி வகித்துள்ளார்.
ஆசிரியர் தினத்தின் முக்கியத்துவம்
மெழுகுவர்த்தி தன்னை உருக்கிக்கொண்டு மற்றவர்களுக்கு வெளிச்சம் தருவது போல, ஆசிரியர்களும் தங்களுடைய அறிவையும் அனுபவத்தையும் மாணவர்களுடன் பகிர்ந்து அவர்களின் வாழ்க்கைப் பாதையை வெளிச்சமாக்குகின்றனர்.
ஒரு மாணவர் எதிர்காலத்தில் மருத்துவராகவோ, பொறியாளராகவோ, விஞ்ஞானியாகவோ, தொழில்முனைவோராகவோ அல்லது வேறு எந்தத் துறையிலும் சாதனையாளராகவோ மாறினாலும், அந்தப் பயணத்தில் அவருக்கு வழிகாட்டிய ஆசிரியர்களின் பங்கு மறக்க முடியாதது.
நம் வாழ்க்கையில் அறிவை விதைத்த ஆசிரியர்களை நினைவுகூரவும், அவர்கள் செய்த பங்களிப்புக்கு நன்றி தெரிவிக்க இந்த நாள் ஒரு வாய்ப்பாக அமைகிறது. இன்று, நமக்கு கல்வியையும் வாழ்க்கைப் பாதையையும் காட்டிய அனைத்து ஆசிரியர்களுக்கும் நன்றி கூறுவோம்.
