காஞ்சிபுரம் மாவட்டம் பரந்தூர் அருகே மதுரமங்கலத்தில் சிப்காட் தொழிற்பூங்கா அமைக்க 8.38 ஹெக்டேர் நிலத்தை கையகப்படுத்த தமிழக அரசு அரசாணை வெளியிட்டுள்ளது. நிலம் கையகப்படுத்தும் நடவடிக்கைக்கு அப்பகுதி விவசாயிகள் கடும் எதிர்ப்பு தெரிவித்துள்ளனர்.
பரந்தூர் அருகே உள்ள மதுரமங்கலத்தில் சிப்காட் நிறுவனம் மூலம் புதிய தொழிற்பூங்கா அமைக்கும் திட்டத்தை தமிழக அரசு முன்னெடுத்துள்ளது. இதற்காக ரூ.175 கோடி மதிப்பீட்டில் திட்டம் செயல்படுத்தப்படும் என்று முதலமைச்சர் விஜய் அறிவித்திருந்தார்.
தொழிற்பூங்கா முழுமையாகச் செயல்பாட்டுக்கு வந்தால், சுமார் 5,000 பேருக்கு நேரடி மற்றும் மறைமுக வேலைவாய்ப்புகள் உருவாகும் என அரசு எதிர்பார்க்கிறது. இந்தத் திட்டத்துக்கான ஆரம்பகட்ட நடவடிக்கையாக, மதுரமங்கலத்தில் 8.38 ஹெக்டேர் நிலத்தை கையகப்படுத்துவதற்கான அரசாணை வெளியிடப்பட்டுள்ளது.
பரந்தூர் மற்றும் ஏகனாபுரம் சுற்றுவட்டாரப் பகுதிகளில் சென்னையின் இரண்டாவது விமான நிலையம் அமைக்கும் திட்டத்துக்கு எதிராக அப்பகுதி விவசாயிகள் நீண்ட காலமாக போராட்டம் நடத்தி வந்தனர். பின்னர், தற்போதைய அரசு பரந்தூர் விமான நிலையத் திட்டத்தை கைவிடுவதாக ஆகஸ்ட் 31-ம் தேதி சட்டப்பேரவையில் அறிவித்தது.
இந்த சூழலில் அதே இடத்தில் தொழிற்பூங்கா அமைப்பதற்காக நிலம் கையகப்படுத்தும் நடவடிக்கை தொடங்கியுள்ளது. இதனால் அப்பகுதி விவசாயிகள் கடும் அதிருப்தி அடைந்துள்ளனர்.
விமான நிலையத் திட்டத்துக்காக நிலம் கையகப்படுத்துவதை எதிர்த்து போராடிய நிலையில், தற்போது புதிய தொழிற்பூங்காவுக்காக தங்களது நிலங்களை கையகப்படுத்துவது ஏற்றுக்கொள்ள முடியாதது என அவர்கள் கூறுகின்றனர்.
இதையும் படிங்க : பக்தர்களிடம் கிளம்பிய எதிர்ப்பு., செல்போன் பாதுகாக்க கட்டணம் வசூலிக்கும் முறை ரத்து
