செயற்கை நுண்ணறிவு தொழில்நுட்பங்களை உருவாக்குவதற்காக செய்தி நிறுவனங்களின் கட்டுரைகள் பயன்படுத்தப்பட்டதாக எழுந்துள்ள விவகாரத்தில், OpenAI மற்றும் Microsoft நிறுவனங்களுக்கு எதிரான நியூயார்க் டைம்ஸ் வழக்கில் புதிய தகவல்கள் வெளியாகியுள்ளன.
நியூயார்க் டைம்ஸ் மற்றும் பிற செய்தி நிறுவனங்கள் தாக்கல் செய்த வழக்கில், தங்களது பதிப்புரிமை பெற்ற கட்டுரைகள் அனுமதியின்றி AI மாதிரிகளைப் பயிற்றுவிக்க பயன்படுத்தப்பட்டதாக 2023-ம் ஆண்டு வழக்கு தொடர்ந்தது.
OpenAI மற்றும் Microsoft இடையே இணையப் பக்கங்கள் மற்றும் பிற உள்ளடக்கங்களை சேகரிப்பது தொடர்பான பல்வேறு திட்டங்கள் செயல்படுத்தப்பட்டதாக நியூயார்க் டைம்ஸ் தரப்பு தெரிவித்துள்ளது. Microsoft நிறுவனத்தின் Bing தேடுபொறிக்காக சேகரிக்கப்பட்ட மிகப்பெரிய அளவிலான இணையத் தரவுகள், OpenAI-க்கு வழங்கப்பட்டதாகவும் தெரிவித்துள்ளது.
அதேபோல், Microsoft உருவாக்கிய இணையத் தகவல் சேகரிப்பு அமைப்பை பயன்படுத்தி இணையப் பக்கங்களின் உள்ளடக்கங்களை நகலெடுக்கும் திட்டமும் செயல்பட்டதாக வழக்கில் தெரிவிக்கப்பட்டுள்ளது.
OpenAI-யின் ஆய்வாளர் ஒருவர் நியூயார்க் டைம்ஸ் இணையதளத்தின் கட்டணத் தடையைத் தாண்டுவதற்கான வழி குறித்து நிறுவனத்திடம் தெரிவித்ததாகவும், அதற்கு சாதகமான பதில் கிடைத்ததாகவும் கூறப்பட்டுள்ளது.
Microsoft தலைமை நிர்வாக அதிகாரி சத்ய நாதெல்லா தொடர்பான கருத்துகளும் நீதிமன்ற ஆவணங்களில் இடம்பெற்றுள்ளன. கட்டணத் தடையுள்ள உள்ளடக்கங்களை அனுமதியின்றி AI பயிற்சி அல்லது தகவல் பயன்பாட்டுக்கு பயன்படுத்துவது தொடர்பாக அவர் சில கருத்துகளை தெரிவித்ததாக ஆவணங்கள் கூறுகின்றன.
செப்டம்பர் 2026-ல் வெளியான நீதிமன்ற ஆவணங்கள், AI பயிற்சிக்காக இணையத்தில் இருந்து தகவல்களை சேகரித்த விதம் குறித்த புதிய விவரங்களை வெளிச்சத்துக்கு கொண்டு வந்துள்ளன. AI பயிற்சிக்கு பதிப்புரிமை பெற்ற செய்திகளைப் பயன்படுத்துவது சட்டப்படி அனுமதிக்கப்படுமா என்பது தொடர்பான இறுதி முடிவு நீதிமன்றத்தின் தீர்ப்பைப் பொறுத்தே அமையும்.
இதையும் படிங்க : 2030ல் ஏ.ஐ மனிதர்களை அழித்துவிடுமா? என்விடியா சி.இ.ஓ சொன்ன பதில்
