வாஷிங் மெஷின் இன்று பெரும்பாலான வீடுகளில் அத்தியாவசிய மின் சாதனமாக மாறியுள்ளது. அவற்றை சரியான முறையில் பராமரிப்பது அவசியம். வீட்டு வேலைகளை எளிதாக்கும் வாஷிங் மெஷினைப் பயன்படுத்தும்போது சிறிய கவனக்குறைவால் துணிகள் சரியாக சுத்தமாகாமல் போகவும், இயந்திரத்தில் கோளாறு ஏற்படவும் வாய்ப்பு உள்ளது. துணிகளை சரியான முறையில் பிரித்து, அளவோடு நிரப்பி துவைப்பது அவசியம்.
டாப்-லோடிங் வாஷிங் மெஷினில் துணிகளை இறுக்கமாக அடைத்து நிரப்ப கூடாது. டிரம்மில் மூன்றில் இரண்டு பங்கு அளவுக்கு மட்டுமே துணிகளை வைப்பது நல்லது. அதிக அளவில் டிடர்ஜென்ட் சேர்த்தால் துணிகள் இன்னும் சுத்தமாகும் என நினைப்பது தவறு. தேவைக்கு அதிகமாக பயன்படுத்தப்படும் சோப்பு, துணிகளில் எஞ்சியிருக்கலாம். மேலும் மெஷினுக்குள் அதிக நுரை உருவாகவும் வாய்ப்பு உள்ளது.
இதையும் படிங்க : CCTV கேமரா வைக்கும் முன் இதை மறக்காதீர்கள்: தனியுரிமை மீறினால் நடவடிக்கை!
சேறு, மணல் போன்ற அதிக அழுக்கு படிந்த துணிகளை நேரடியாக வாஷிங் மெஷினில் போடுவது இயந்திரத்தின் செயல்பாட்டை பாதிக்கலாம். அதேபோல் செல்லப்பிராணிகளின் முடிகள் அதிகமாக ஒட்டியுள்ள போர்வைகள் போன்றவற்றையும் முன்கூட்டியே சுத்தம் செய்த பிறகு மட்டுமே மெஷினில் போடுவது நல்லது.
கனமான போர்வைகளை மெஷினில் துவைக்கும் முன் அதன் கொள்ளளவை சரிபார்க்க வேண்டும். மெஷின் அதிக திறன் கொண்டதாக இருந்தாலும், மிகவும் எடையுள்ள போர்வைகள் அதன் மீது கூடுதல் அழுத்தத்தை ஏற்படுத்தலாம். எனவே, மெஷினின் கொள்ளளவை மீறும் அளவுக்கு கனமான பொருட்களை துவைப்பதைத் தவிர்ப்பது பாதுகாப்பானது.
வாஷிங் மெஷின் இயங்கிக் கொண்டிருக்கும்போது ஏதேனும் பிரச்சினை ஏற்பட்டால், குறிப்பாக தானியங்கி கதவு சரியாக பொருந்தாமல் நின்றுவிட்டால், அதை வலுக்கட்டாயமாக கையாளாமல் தொழில்நுட்ப நிபுணரின் உதவியை பெறுவது பாதுகாப்பானது.
அடர்ந்த சிவப்பு, ஆரஞ்சு உள்ளிட்ட சில நிறத் துணிகளில் சாயம் வெளியேறும் வாய்ப்பு அதிகம். அவற்றை மற்ற வெளிர் நிற துணிகளுடன் சேர்த்து துவைத்தால் நிறம் பரவி மற்ற ஆடைகளின் தோற்றம் மாறக்கூடும். எனவே நிறம் விடக்கூடிய துணிகளை தனியாக பிரித்து துவைப்பது நல்லது.
இதையும் படிங்க : இந்த மீனோட விலை கிலோ 15 ஆயிரம் ரூபாய் ; அப்படி என்ன இருக்கு இதுல?